quelóquios mirandeses

Garabatos i Rodadeiras (5)

2008-05-24T17:07:00.003+01:00

[CUNTINAÇON]

SALIDA

Ls animales stan spalhados pula sala. Se fur possible, cada un debe de lhebar la sue rodadeira i l sou garabato. Se nun fur a rodar, lhieba-la na mano ó anfilada pul cachaço. Anquanto fálan ban-se achegando de l trabiado, mas debagar.

Todos

Cada un dá l sou grito, mui fuorte, de l cantico ó de l sítio de la sala adonde stá. L grito ye repetido, cada beç mais alto, dues ó trés bezes. Até puode ser ajudado cun sonidos grabados.

Macaco

Ye fiesta, naide se squeça,
You trouxe l bombo cumigo
Bamos antes que caleça
La calor ye un castigo

Toca un bombo.

Burro

Ah camarada cabalho,
Nun tenes ua pomada
Tengo las patas an calho,
Só por dar tanta patada.

Todos

Cantando

OhOh!
OhOh!
OhOh!

Girafa

Sou you quien boto ls foguetes
Q’han-de chegar a las streilhas!

Todos

A las streilhas?

Cantando

OhOh!
OhOh!
OhOh!

Cabalho

I you agarro las canhas
I fago ua carga deilhas.

Todos

Canha, canhada, canhal,
Mas que grande chabascal.

Cantando

OhOh!
OhOh!
OhOh!

Antretanto dében de tener chegado al trabiado. Ban cantando siempre la mesma cantilena até todos chegáren alhá. De repente páran i ampéçan todos a çcutir uns culs outros, cada beç mais alto, nua grande algazarra.

Lhion

Calhados! Naide s’antende
Se nun houbir rei ó roque.

Todos

Roque, roque, roque!
Roque, roque, roque!

Lhion

Rei, rei, rei!

Todos dan grandes risadas.

Alifante

Que seia la rodadeira
Que tenga l nuosso reinado.

Perro

Nun digas tan grande asneira:
Debe ser l garabato!

Raposa

Rodadeira faç andar
Palantre la nuossa bida.
Nun mos podemos quedar
Porque hai siempre ua salida.

Todos

Cantando

Nun mos podemos quedar
Porque hai siempre ua salida.

Pita

Nun sabe par’onde bai
La ruodra sin garabato.

Parra

Spierto cumo el nun hai.
Ye bun pie, melhor çapato.

Cochino

Un sin outro nun son nada,
La fuorça stá n’ounion:
Ben de nós, nun mos ye dada,
Nun bonda tener rezon.

Todos

Cantando

Asperar nun stá na moda
Roda, roda, rodadeira.
Nun hai bendímia sin poda,
Segada sin sementeira.

Hai que fazer ls caminos
Onde bamos caminar
Fazemos nuossos destinos
Cun nuossa ruodra a rodar.

Asperar nun stá na moda
Roda, roda, rodadeira.
Nun hai bendímia sin poda,
Segada sin sementeira.

L mundo nun naciu feito
Ten que star siempre a crecer
Hai que rodar, seia a dreito,
Seia arressaios fazer.

Asperar nun stá na moda
Roda, roda, rodadeira.
Nun hai bendímia sin poda,
Segada sin sementeira.

Cad’un de sou mal se queixa
I talbeç tenga rezon,
Mas maior ye l mal que deixa
Asperar la seluçon.

Asperar nun stá na moda
Roda, roda, rodadeira.
Nun hai bendímia sin poda,
Segada sin sementeira.

Ban todos salindo i cantando la cantiga i acaba l quelóquio quando todos acabáren de salir.

FIN

Dezembre de 2001

Fracisco Niebro

Garabatos i Rodadeiras (4)

2008-05-18T17:00:00.004+01:00

[CUNTINAÇON]

3º QUADRO

L GARABATO SIN RUODRA

Stá un lheiron sentado a ua mesa a ler un lhibro, cun oclos i todo. A las bezes, lhebanta la cabeça i queda-se a pensar, abanando la cabeça. Apuis torna a la lheitura.

Lheiron

Bamos a pensar: anton,
Se son tan spiertos ls ratos,
Muito mais ye un lheiron (apunta para el)
Subretodo cun çapatos.

Albanta-se i dá ua buolta, parando a las bezes, a modo de star a pensar. Apuis, derigindo-se al público.

Sabeis porque creci tanto
I ls ratos quédan pequeinhos?
L miu celebro ye un spanto,
L de ls ratos ye un cermeinho.

Mirai bien ls mius bigotes,
Naide hai mais grande quen you!
Anque tenga alguns calotes
Pa qualquiera lhado bou.

Dá mais ua buolta. Apuis para i diç.

Cun esta mie fortaleza,
Nun era muito se fura
Rei de tod’essa bicheza:
Naide ten la mie altura!?

Nesto entra la girafa, cun un cachaço mui alto. Bai andando debagar i mirando pa to ls lhados. L lheiron, quando bei la girafa, queda mui admirado i cheno de miedo. Anquanto la girafa bai andando el bai tamien andando atrás deilha, siempre mirando pa riba i abanando la cabeça de modo que nin bei por adonde anda i sbarra-se acontra la girafa.

Girafa

Quien s’atirou contra mi?
Un cínfano rui, talbeç...

Quier mirar para baixo mas l cachaço stá tan alto que bate cula cabeça an riba i nun cunsige ber grande cousa.

Mas pa que tanto creci?
Ambeijo la pequenheç!

Ah, quien me dira porbar
Yerba berde de ls caminos!
Assi scusaba d’andar
Culas nubres ne ls çofinos.

L lheiron yá nun aguanta mais i zmaia, stendendo-se ne l suolo. La girafa cuntina a andar, tropeça ne l lheiron i cai-se. Apuis de caida queda mui spantada de chegar cul çofino al suolo. I mirando pa l lheiron.

Á! Cumo l mundo mudou
Cumo quedei demudada:
Bou-me a quedar cumo stou,
Pus stá-se melhor deitada.

Entra la raposa a ler un lhibro i bai-se rindo an grandes risadas. Senta-se na mesa i cuntina a ler i a dar risadas. Apuis albanta-se i diç:

Raposa

Diç eiqui que spierta sou:
Nunca nesso habie pensado...
Mas quien assi m’ambentou
Staba, por cierto anganhado.

Dá mais uas risadas i apuis cuntina:

Ind'onte antrei nun polheiro
Pa comer uas pitaças:
Cumo nun se bie l nieiro,
Anchi-me de galhinaças.

Apuis, apertando la barriga culas manos i drobando-se al para lantre:

Quedei cun sfuira i fastiu,
Que nin m’aguanto de pies.
Até l duonho, mal me biu,
Me matou a cuntapies.

Dito esto deita-se ne l suolo a spernear, agarrada a la barriga.

Entra l Lhion, bestido de rei, cun ua corona na cabeça. Bai andando, passando por riba de ls animales que stan deitados. Apuis anrabia-se i atira cula corona al solo, dezindo:

Lhion

Yá stou farto de ser rei
Farto de nun mandar nada:
Naide respeita mie lei,
Todos fázen caçuada.

Quejírun democracie
I todo fui mui lhimpico:
Para botos houbo un die
Botei por todos, solico.

Agora nun quieren botos
P’eilegir quien you comer:
Yá tengo ls çapatos rotos
De atrás deilhes correr.

L macaco entra i mal bei l lhion ampeça-se a rir cun grande algazarra i dando saltos i gritos cumo fázen ls macacos. Apuis diç deregindo-se al lhion:

Macaco

Anton tu q’ries q’abaixara
De l’arble pa me comeres?
Só falta que s’achegara
L’auga pa tu la buberes.

Mira, you sou eilegante
De saltar de galho an galho.
Se me spercato, nistante
Acontra l suolo me spalho.

Por esso ando alancado,
Mas nun ye menos berdade:
Nunca há-de haber un mercado
Que benda la lhibardade.

L macaco pon-se a saltar i a cantar:

Nunca há-de haber un mercado
Que benda la lhibardade.
Nunca há-de haber un mercado
Que benda la lhibardade.

Entra la queluobra de rastros. Mas l macaco nun para de cantar la mesma cantiga. A cierta altura la queluobra diç:

Queluobra

Tu bien falas... tenes pies!
Ai cuitadica de mi,
Siempre a arrastrar-me to ls dies...
Por esso quedei assi...

L macaco cuntina cula cantiga, repetida cumo se fura ua cantilena. La queluobra i ls outros, yá fartos de l oubrir:

Todos

Calha-te!

Queluobra

El stá boubico
I canta de mala gana:
Hai que fazer pul corpico,
La lhibardade nun mana.

Todos

Hai que fazer pul corpico
La lhibardade nun mana.
L que nin custa un cachico
Nun se defende cun gana.

Queluobra

You sou lhibre a arrastar

Zebra

You cul bafo a fazer nubres

Raposa

Ai que me bou a sfuirar

Lheiron

I you, será que çcubres?

Lhion

Hai que fazer pul corpico

Todos

La lhibardade nun mana
L que nin custa un cachico
Nun se defende cun gana.

Cada un ten sou camino,
Cad’un la sue lhibardade,
Cada bida ye un hino
Se ye lhibre de berdade.

Sálen todos cantando.

(cuntina)

Garabatos i Rodadeiras (3)

2008-05-17T01:24:00.006+01:00

2º QUADRO

L GARABATO SPABILADO

Stan deitados no trabiado ua baca, un cabalho, un cochino i un gato. La baca stá a remenar i a las bezes ourreinha; l cabalho a cada cachico albanta-se, dá ua corridica i relincha; l cochino ronca; l gato mia. Todos fázen algo, anterbalamente, mas sin dezir palabra.

Al fin dun cierto tiempo entra l lhobo. Dá ua buolta al redor de ls animales que stan deitados i bai ouliando. Apuis de dar dues buoltas i mirar bien pa cada un, buolbe-se pa l público.

Lhobo

Que grande porblema achei:

Qual deilhes bou a comer?

Parécen duros. Nun sei

Se sou capaç de ls rober.

Mira para eilhes, mas estes nin míran par’el. Apuis ampeça a apuntar culs dedos cumo quien stá a dezir ua cantiga de ls ninos a ber an quien calha qual deilhes bai a comer. La cuntaige acaba ne l gato.

Este nun chega al caneiro...

Ye bien pequeinho, l cabresto!

Bou-lo a comer mui delgeiro

El nun sufre i sou hounesto.

L lhobo buolbe-se i atira-se al gato pa l comer. L gato nin se defende. Anton l lhobo deixa-lo i diç:

Tenes de luitar, dar mios,

Senó nun me sabes bien.

I bós? Fazei d’einemigos,

Lhuitai por el tamien.

L cochino dá un ronco fuorte, mas sin s’albantar.

Cochino

Deixa l garoto, mazmárria!

Nun bés que stá a rezar

Pa curar ua caçcárria?

Purmeiro ten’s de pensar:

Yá só ten cuornos la baca,

Caçcanhetes l cabalho,

You mais pareç’ua staca,

Nanhun paga l tou trabalho.

L lhobo pon-se a mirar par’eilhes. Apuis dá ua buolta ancolhendo ls ombros, sin saber l que há-de fazer. Anton l gato pon-se atrás del debarico, apuis dá un mio mui fuorte i l lhobo spanta-se i ampeça a fugir de miedo.

Gato

Mira que un rato comi

Caçado nua rateira.

Mas sabes l qu’angolhi?

Remédio de caganeira.

La baca, l cabalho, l cochino i l gato dan grandes risadas, cada un a la sue maneira. L lobo, mui spantado, bai-se ancostando a ua squina cun miedo.

Cochino

Ten cuidado, bien t’abiso

La bida stá cumplicada.

Por esso, se tenes siso,

Melhor ye nun comer nada.

Grande risada.

Baca

Sabes quei ye l’arbicida

Que seca yerba i las binhas?

Pon-me mala i ancolhida,

Ne ls cuornos faç-me cuçquinhas!

Grande risada.

Cochino

Ten cuidado, bien t’abiso

La bida stá cumplicada.

Por esso, se tenes siso,

Melhor ye nun comer nada.

Grande risada.

Cabalho

You fiç ua ouparaçon

Dua patada que dei

Quedei fuorte i balenton

Fierro ne ls ussos botei.

Grande risada.

Cochino

Ba, bai-te a aguçar ls caneiros

Ne ls xeixos de la ribeira.

Grande risada. Bolbendo-se pa l público.

Ls lhobos stan mui biqueiros

Yá todo le faç denteira.

L lhobo bai-se ambora cul rabo antre las piernas, mas nun chega a salir, quedando nua punta.
Ls mesmos animales déitan-se cumo ne l prencípio, repetindo-se ls feitos de cada un.
Al fin dun cierto tiempo entra ua zebra a abrir-se-le muito la boca i a spreguiciar-se. Quando ls bei ampeça a cuntá-los. Mas eilhes nin míran pa la zebra.

Zebra

Burro, cochino, cabalho.

L que faç eiqui un gato?

Cuntina a spreguiçar-se i a abrir la boca.

Drumi tanto, fiç un calho

I até perdi un çapato.

Cabalho

Falando pa la Zebra.

Até ls burros proua ténen

I a las riscas yá se píntan.

Nas nuobas modas que bénen

Inda hai muitos que se fíntan.

Zebra

Dás patadas cula boca,

Nin sabes a quantas andas.

Deregindo-se a todos.

Porque bos meteis na toca,

Se to l mund’anda an bolandas?

Cochino

Pa l gato

Mira cumo fala bien.

Gato

Mas adonde habemos d’ir?

Baca

Esso digo you tamien.

L que stará pa benir?

Zebra

Lhebantai-bos, spabilai-bos,

Pensai por buossa cabeça.

Lhebantai-bos, spabilai-bos,

Ye assi que todo ampeça.

L lhobo sal dalhá de trás i ben andando para an pie de ls outros i deregindo-se a eilhes.

Lhobo

Lhebantai-bos, spabilai-bos,

Pensai por buossa cabeça.

Lhebantai-bos, spabilai-bos,

Ye assi que todo ampeça.

Cochino

Pa l gato.

Alhebanta-te i spabila-te,

Pensa pula tue cabeça.

Alhebanta-te i spabila-te,

Ye assi que todo ampeça.

Cabalho

Pa la baca

Albanta-te i spabila-te,

Pensa por la tue cabeça.

Albanta-te i spabila-te,

Ye assi que todo ampeça.

Zebra

Cantando

Nunca nada stá perdido

Siempre hai puortas par’abrir,

Siempre un remédio scundido:

Solo hai que lo çcubrir.

Todos

Cantando

Lhebantai-bos, spabilai-bos,

Pensai por buossa cabeça.

Lhebantai-bos, spabilai-bos,

Ye assi que todo ampeça.

Zebra

Cantando

Quando nada se cumpon

I la fraqueza mos truoça,

Hai siempre ua seluçon:

Fazer de fraqueza fuorça

Todos

Cantando

Lhebantai-bos, spabilai-bos,

Pensai por buossa cabeça.

Lhebantai-bos, spabilai-bos,

Ye assi que todo ampeça.

I assi acaba l 2º quadro, cun todos a cantar. Al modo que ban cantando ban-se ponendo dreitos i cantando cada beç mais alto.

[CUNTINA]

Garabatos i Rodadeiras (2)

2008-05-02T00:37:00.007+01:00

(cuntinaçon)

1º QUADRO

L AMBELHIGO NUN SIRBE DE RODADEIRA

Burro

Entra mui cargado an cena, meio alancado. Dá ua buolta i quaijeque se deixa caier. Apuis, senta-se mas sin atirar cula carga. I al modo que fala bai-se deixando derrear cula carga.

Ai! Cumo stou de cansado,

Que fame tan grande tengo!

Só sonho cun berde prado.

Yá nin sei d’adonde bengo.

Oube-se un rugido a modo passos. L burro quier-se lhebantar, mas nun ye capaç.

Benerá ende l miu amo?

Traio cargas há tant’anho!

Mas porrada i palha seca

Ye todo quanto you ganho.

Entra l perro a fariar l suolo, i dá la buolta sin lhebantar l çofino. Cumo nun bei por adonde bai sbarra-se acontra l burro i bota-lo abaixo cula carga, fazendo un stelondro mui grande.

Burro

Tu nun bés por adonde andas?

Parece que perdiste algo...

Perro

I tu porque nun dezandas,

Pus cuorres más do qu’un galgo?

Burro

Anquanto tenta lhebantar-se. Alhá se lhebanta i bai salindo, mas torna a caier assi que acaba de falar.

Nunca un burro ten çcanso ...

Yá nun aguanto la carga.

Aceitei todo, fui manso,

I esta bida ye la paga.

Perro

Ai quien me dira ser burro,

Muita yerba hai pulas bordas!

You fiç-me an pieles i çurro,

Só las sanchas quédan gordas.

L perro bai dando buoltas a fariar l suolo.

Mas que andaba you a achar,

Cula cabeça amarrada?

Afize-m’a fariar,

Inda que nun ache nada.

Éntran l parra i la pita a çcutir subre quien pon ls uobos mais grande i melhores. Fázen géstios un pa l outro.

Parra

Ls mius uobos son pipudos

Mas ls tous son carraspudos.

Pita

You pongo uns uobos pimpones

Son guiros ls que tu pones

Parra

Pus tu nin sabes nadar...

Pita

I tu mal puodes andar...

Parra

Tengo prumas más galanas.

Pita

Las mies son todas armanas.

Perro

Mui anrabiado i a modo lhadrando pa la parra i pa la pita.

Calhai-bos! Agora l fário,

Yá nun sei adonde l pus!

Yá nun bonda l miu calbário

I inda aturar estas dues!

L perro cuntina a fariar i la parra i la pita cuntínan a çcutir cun muitos géstios, mas sin naide las oubir.

Nesto entra l cordeirico, mui pensatible i bai andando al redror. Ls outros, quando l béien, míran uns pa ls outros i apuis pónen-se todos a andar al redror atrás de l cordeirico. Este a las bezes para i todos ls outros páran atrás del. A cierta altura bai dezindo debagar i siempre pensatible, lhebantando l dedo, falando solico, cumo se naide stubira alhi. Para para falar, anda, pára, tornar a andar...

Cordeirico

Mi mai fui pa las arribas,

You perdi-me de l ganado,

Todo por bias las chibas.

Eiqui stou mais çcansado:

Puodo quedar a pensar

Até que ls dientes me náçan.

Se l lhobo ende passar

Las eideias nun se cáçan.

Eiqui buolbe-se al para trás i bei ls outros todos i ampeça-se a rir cun muita fuorça, cumo se stubira a berriar. Apuis, falando para eilhes, anquanto bai dando passos a las arreculas i parando de beç an quando. Ls outros ban atrás del, mas apuis tamien se pónen a las arreculas:

Ua pita, pata, perro,

L mund’anda al para trás,

I todo parece un erro,

Cumo l burro de tiu Brás.

Burro

Boziando de l sítio adonde stá, meio caído ambaixo la carga, cuidando que l cordeirico stá a falar par’el.

Yá m’albanto! yá m’albanto!

Quien fui que chamou por mi?

Mirai que nun me perdi

I inda cula carga aguanto.

Al dezir esto, l burro deixa-se caier. Ls outros rien-se todos muito. Apuis páran i cuntínan a andar a las arreculas, siempre al redror.

Nesto sinte-se un rugido mui fuorte que bai oumentando. Entra un alifante i para a meio de l trabiado: ls outros ban andando al redror del, culs uolhos mui arregalados, i tamien l alifante bai rodando mas sin salir de l sítio.

Cordeirico

Falando baixico pa la pita i la parra, mas apuntando al alifante.

Que dientes tan grandes ten!

I ua mangueira na punta!

Será un lhobo que ben

De yá regar la sue huorta?

Pita

Falando pa la parra

Águila ó cuorbo talbeç ...

Bien grande l’uobo onde caba...!

Parra

Falando pa la pita

Yá biste bien la sue teç?

Que grande boto eilha daba!

Perro

Agarrando-le la tromba al alifante

Se tubira la tue tromba,

Fariaba até las streilhas.

Bamos a ber quien mais zomba?

Amprestas-me las oureilhas?

Ríen-se todos. Apuis cuntínan todos a andar al redror de l alifante. Anton este ampeça a cantar, mas sin parar d’andar al redror.

Alifante

Cantando

Yá bou quedando mei boubo

De siempre andar al redror:

De ls oubidos yá nun oubo,

Na tromba tengo un delor.

Todos

Cantando

Parra, pita, burro, perro,

Onde stá l nuosso erro?

Parra, pita, burro, perro,

Onde stá l nuosso erro?

Alifante

Cantando

Onde queda la salida

Desta ruodra que nun pára?

Tengo la puorta perdida,

Quedei sin uolhos na cara.

Todos

Cantando

Parra, pita, burro, perro,

Onde stá l nuosso erro?

Parra, pita, burro, perro,

Onde stá l nuosso erro?

Cantando, siempre al redror, cai l panho pa l fin de l purmeiro quadro.

[CUNTINA]

Garabatos i Rodadeiras (1)

2008-04-18T01:22:00.013+01:00

Por Fracisco Niebro

GARABATOS I RODADEIRAS

Quelóquio an trés quadros, cun antrada i salida

Dezembre de 2001

Colaboraçon

Alunos de l 7.º anho de la Scuola EB23 de Sendin, anho letibo de 2001-2002, i l sou porsor de mirandés Carlos Ferreira

[Yá publicado ne l jornal L PAULITEIRO, de la Scuola EB23 de Sendin, 2002]

Figuras, scolhidas puls alunos

Alifante

Burro

Cordeirico

Perro

Parro

Pita

Baca

Cabalho

Cochino

Gato

Lhobo

Zebra

Girafa

Lheiron

Lhion

Macaco

Queluobra

Raposa

ANTRADA

Éntran na sala bários animales, un de cada beç, a rodar sue rodadeira cun defrentes garabatos. Quando cada un chega a la frente apresenta-se, culs bersos que bénen a seguir, i apuis sal outra beç a rodar cula rodadeira. La orde d’antrada puode ser cumo eiqui stá apresentada ou outra qualquiera, cunsante l regrante ache melhor. Tamien puode adaptar a menos figuras s’acauso l númaro d’alunos fur mais pequeinho.

Las rodadeiras puoden ser mui defrentes uas de las outras. Uas dében de poder rodar i outras nós; uas cun garabato i outras sin el; uas grandes i outras mui pequeinhas; de defrentes materiales. L eidial era que nun houbira dues armanas.

Alifante

You sou l galano alifante

Cun dientes cumo stadulhos

Tengo ua tromba gigante

I uolhos cumo dous bulhos

Burro

Spierto cumo you nun hai

Por esso me cháman burro

Se la carga se me cai

Boto-me a correr i zurro

Cordeirico

Yá bistes bien la mie lhana?

Claro, sou l cordeirico

I quando bos dá la gana

Comeis-me bien assadico

Perro

Fago lhiebres i coneilhos,

A las bezes tamien erro

Drumo na rue, an corteilhos,

I lhiebo bida de perro

Parra

You sou la parra, parreca,

Fui you q’ambentei las praias

Mas sou lhebada de la breca

I nado siempre de saias

Pita

Pongo uobos redundicos

Tengo prumas queloridas

Que déixan ls galhos boubicos

Culas cristas astrebidas

Baca

Ponírun-me estes dous galhos

Mas nunca botórun fuolha

Mas ir a parar als talhos

Nun ye bida que se scuolha

Cabalho

Se me fázen relinchar

Quando me spétan la spora

Pongo-me a scatrapulhar

Cumo me bedes agora

Cochino

Siempre acabo anchouriçado

Nun m’adelantra grunhir

Sou un cochino asseado

Cheiroso se you quejir

Gato

Sou l gato de siete bidas

Stou scumioso de ratos

Pus agora las comidas

Até las pónen an pratos

Lhobo

Dízen que yá nun eisisto

I naide gusta de mi

Quando la piele me bisto

Quedo un lhobo malo, assi (oulia)

Zebra

Sou zebra i nun sou burro,

Mas siempre era cunfundida

Ye por esso que nun zurro

I stou de riscas bestida

Girafa

Claro que sou la girafa,

Bonda ber l miu cachaço:

Lhargo cumo ua garrafa

L cuorpo feito un anchaço.

Lheiron

Cumo lheiron bien criado

Até meto miedo als gatos

Cul miu rabo bien tratado

Mando ne l mundo de ls ratos

Lhion

You bien pongo la corona

Mas naide de mi faç couso

Yá nun sou lhion, sou lhona,

Sin un palácio i sin pouso.

Macaco

Gusto de las macacadas

Fago trites, cambadielhas,

Uso calças amprestadas

Pa nun caier nas sparrielhas

Queluobra

Sou lharga cumo un sobeio

Tamien me fago an nobielho

Ancanto todo l que beio

Mas yá tengo l fário bielho

Raposa

Todos cúidan que sou fina

Todos stan mui anganhados:

Spreito l miedo an cada squina

Que ls perros son açomados.

[cuntina]

L Barbeiro que dou an Doutor 3

2008-03-26T19:05:00.003Z

quelóquio de Carlos Ferreira

III ATO

Apersentadora — Anton! L que bos dixe you? Cada beç stais a gostar mais, nó?!

Apersentador — Nun adelantra, esta manha yá naide la tira. Buono, este último ato passa-se ne l anho dous mil i dieç. Nun sei cumo hai giente capaç d’adebinar l feturo! Mas neste quelóquio nun falha.

Apersentadora — Nesse tiempo, las gientes nuobas yá nun percísan de quedar a trabalhar nas grandes cidades. Yá puoden benir a anstalar-se nestas nuossas tierras i fazer la sue bida aqui.

Apersentador — Nesso nun me finto you. Buono! Anton cumo iba a dezir, Lice Lindaixa casou-se cun Manuol Melufa. Eilha formou-se i adoutorou-se no stranjeiro an biologie — botánica, recursos andógenos i framácia —, quier dezir : trabalha subre las yerbas de la nuossa region para ua grande ampresa, que faç remédios.

Apersentadora — Lice cumo era ua ambestigadora de renome anternacional, mui fuorte, mui fuorte, i habie muitas ampresas que la querien, oubrigou la ampresa para adonde fui a trabalhar a muntar un laboratório de pesquisa de las yerbas an Sendin.

Apersentador — Essa ampresa daba amprego a muita giente i pagaba bien. Mas, cumo diç l outro, era preciso coincer las yerbas.

Apersentadora — Manuol Melufa, specializou-se an medecina generalista, ne l stanjeiro, i outeliza remédios naturales que fabrica la mulhier i técnicas mui abançadas para sanar. Abriu un grande cunsultório an Sendin i ben giente de to l lado aqui a consultá-lo. Ye un doutor mui afamado

Apersentador — Ls bielhos, que stában no cielo, nien acraditában.

Apersentadora — Para saber l restro, teneis que quedar até al fin.

1° CENA

(Dun lado de la cena tenemos l laboratório de Lice Lindaixa i doutro lado tenemos l cunsultório de Manuol Melufa. Lice Lindaixa trabalha cun las sues yerbas, a fazer remédios. Ten bárias yerbas spalhadas anriba dua mesa, i uas caixas cun tabuletas de letras gordas, cun nomes de yerbas daqui. Cun eilha staba tie Marie Concha, que yá era bielha i conhecie ls nomes de las yerbas an Mirandés.)

Lice Lindaixa — Nunca pensei que habisse tanta yerba defrente. You pensaba que yá las conhecie a todas, mas nó. Antre buonas i ruis yá tengo mais de mil.

Tie Marie Concha — I eilha yá nun fui a scabar binha, senó ye que deziedes! Agora yá solo bótan l remédio, yá naide quier scabar. Mas hai anhos, por tarde, bénen uas yerbas! Ampossible eilhas nun tubíssen benido ne l frasco de l remédio!

Lice Lindaixa — Ai! i porque diç esso ?

Tie Marie Concha — You sei alhá! Parece que antes de haber l remédio naide habie bisto dessa muxinga. Por eisemplo: aqueilhes foguetes, que bénen por tarde, naide ls zlenta. Quantos mais s’arríncan mais nácen. I, s’ua pessona ls deixa, fázen-se cumo aljarudes.

Lice Lindaixa — Aljarudes?! Á tie Marie, l que son aljarudes?

Tie Marie Concha — Pus you sei alhá! Ye berdade que dezimos assi, quando ciertas yerbas subírten por riba d’un, mas nun conheço nanhue yerba cun esse nome.

Lice Lindaixa — Á tie Marie, cumo se cháman estas quatro yerbas aqui?

Tie Marie Concha — Esta son pimpilros, estes son cachapeiros, estes son marrolhos i esta ye palitária.

Lice — I estas yerbas antigamente serbien para algue cousa?

(Lice, anquanto tie Concha falaba, iba screbindo nun bloco)

Tie Marie Concha — Mire ls cachapeiros, ye ua yerba mui çprézio. Solo serbien para dar cabo de las costielhas a arrincar-los, nun habie animal que ls comira.
Ls pimpilros inda se podien dar als coneilhos i las mulas comien-los, mas quando habie que ls arrincar dában trabalho cumo l restro.
Ls marrolhos, quaije solo médran ne ls caminos an pie de las paredes i serbien para queimar an la fogueira de San Juan. Botában un cheiro tan buono!
La palitária, habie giente que fazie chá, mas you nun sei para que malzina serbie. Anda q’eu le hei-de preguntar a tie Lucinda Ambelga, eilha debe de saber.

Lice — Mire i nas huortas, nun habie yerbas buonas para fazer salir la rata dalhá ?

Tie Concha — Nó mas si habie! Mas you nesso nunca acraditei muito. Dezien que tenendo alhá uns castanheiros brabos nun daba la rata, mas solo l cheiro daqueilho ambolcaba. Habie outros que tenien outras yerbas, mas esso you nunca liguei.

Lice — I las bordelagas, nun fazie salada deilhas? Nun las botaba ne l caldo?

Tie Concha — Bordelagas ne l caldo?! Á mulhier, deixai-me desso. Bordelagas solo pa ls cochinos. Habie ua tie de baixo, chamában-le tie Algarabia, que si fazie salada deilhas, mas la giente d’acá l’única comida de cochino que come son patatas.

Lice — Mire tie Marie, i aqui esta parte desta flor cumo se chamaba ?

Tie Concha — Bós tamien poneis cada sacadielha?! Pus you sei alhá! Yá ye meidie, yá me bou. Tengo que fazer l almuorço pal miu Antónho. Bá, até lougo.

Lice — Até lougo tie Marie, you tamien yá bou a ir.

2° CENA

(Manuol Melufa stá sentado ne l sou cunsultório, a ber cousas ne l cumputador. Apuis albanta-se bai até la puorta i manda antrar la purmeira pessona.)

Manuol Melufa — António Alves Pimentão! (Entra tiu Antonho Papialgo i senta-se .)

Tiu Antonho Papialgo — Buonos dies Sr. Doutor Manuol. Yá nun me conhece ó nó?

Manuol — Buonos Dies, anton nun habie de conhecer?! Sodes tiu Antonho Papialgo. Inda bos cortei uas poucas de bezes l pelo na barbarie de tiu Bulmiro Faca Aguçada.

Tiu Antonho Papialgo — Faca Aguçada, Dius l tenga an çcanso! Quien habie de dezir que el, l Melufa de la barbarie de Faca Aguçada, habie de chegar a un doutor assi apilarado desta maneira. Diç que tols dies, ten esto cheno de giente. You nunca tenie benido acá, mas hoije quedei barado. Alhi na sala de spera, hai de todo: spanholes, pessonas de baixo, franceses, angleses, mais raças que you sei alhá. Nin pa ls farrapos de Miranda ben tanta giente!

Manuol — Anton essa salude, que tal bai ?

Tiu Antonho — Mire, tengo un delor aqui nas cuostas, que até me custa a arcar. You inda pensei que fusse zmanchado, mas yá me puxei dues bezes i nun hai maneira de me passar.

Manuol — Deitai-bos de cuostas aqui. (Tiu Antonho deita-se na cama de cuostas. L doutor scuita-lo, agarra l rato de l cumputador i passa-lo pulas cuostas.)

Manuol — Yá se puode albantar tiu Antónho. Sente-se.

Tiu Antonho — A mi si me dezírun que curaba cul cumputador, mas ua cousa ye bé-la outra dezir-la. Ácerta! Anton l que tengo Sr. Doutor? Cousa rui?

Manuol — Nó, nun há-de ser nada. Ten q’andar menos de carro i mais a pie. Faç bien andar a pie, i anquanto anda a pie fala culas pessonas. Bai a tomar estes remédios nuobos, feitos de yerbas de las arribas. Se nun le passar torne acá.

Tiu Antonho — Parece-me que yá stou melhor, nun sei se fui de l couso de l cumputador... Bá, Sr. Doutor oubrigado. Até soutordie.

Manuol — Adius tiu Antónho, dé bejitas an casa i las melhoras.

(tiu Antonho sale i l Doutor chama outra pessona.)

Manuol — Cândida dos Reis Xavier.

Tie Cándida Palomba — Buonos dies Sr. Doutor. Stába alhi un spanhol a zirrar i a zirrar que era antes de mi i you a dezir que nó.

Manuol — Ei tie Candida Palomba, buonos dies. Anton outra beç por qui? Ls remédios que le dei nun le pintórun ?

Tie Cándida Palomba — Ai, nien me fale Sr. Doutor. Agora pareço outra mulhier. Aqueilhas mistelas que tomei fazírun-me tan bien, tan bien... I éran doces! Nó, hoije bengo acá por bias de l miu Abilio. Cousa mais maluca nunca you bi. Yá un més que l ando a dezir para benir a bé-lo mas nun adelantra. Maluco cumo un burro!

Manuol — I anton que ten?

Tie Cándida Palomba — Nun sei, el diç que nó, mas you acho que aqueilho ye freima. You acho q’aqueilho ye l bino que le subirte a la cara. Mas nun adelantra falar cul, parece-me que cada beç bebe mais.

Manuol — Eilha inda l faç mais do que el ye. Anton s’el nun quier benir cumo bamos a fazer?

Tie Cándida Palomba — Nun sei, mas se el fusse un destes dies até nuossa casa dezindo que iba para me ber a mi. Si, nun antende?

Manuol — Antendo you de mais. Stá treminado.

Tie Cándida — Oubrigado Sr. Doutor, nun sei cumo le hei-de pagar. Ls buonos dies a la buossa Lice. Se quejir uns frajonicos de casca, que nun passe gana deilhes que you astanho tube muito.

Manuol — Tá bien tie Cándida, you digo-le. Adius.

(L doutor iba–se a purparar para chamar outra pessona, quando aparece Lice a correr, mui albrotada, cun un papel na mano.)

Lice — Manuol, mira, mira. Olha l que recebi!

Manuol — L quei? Acalma-te.

Lice — Acabei agora de recebir por anternete la nobidade.

Manuol — Mas que nobidade?

Lice — Acho que fui aperpuosta para recebir l prémio Nobel…

Manuol — Tu stás bouba! Ai se ls bielhos bíssen esto de l cielo! L que dirien?!

3° CENA

(Afinal, tiu Bulmiro Faca Aguçada, tiu Jesé Saca Miedos, tiu Fracisco Fardela Rota que ajudórun i ansinórun Melufa, stában agora ne l cielo a oubir i a ber todo l que el dezie. Éran ls anjos de la guarda del. Nesta cena, cun San Pedro, stan estes trés personaiges, cada un cun uas alicas brancas a falar subre la fama de Manuol Melufa i Lice Lindaixa, la mulhier. Eilhes de riba bien todo, i quaije que tamien nun acraditában.)

Tiu Jesé — Á Bulmiro, mira-me par’este peste agora! Quando ampeçou a trabalhar na tue barbarie solo tenie fame i merda anriba del…

Tiu Bulmiro — Peste!? Esso diç el! You siempre dixe que l rapaç iba longe i nun m’anganhei. Inda bien que you l acarinei.

Tiu Fracisco — Baliente rapaç! Gusta-me a mie la giente fina i libaral. (bolbendo-se para San Pedro) Á San Pedro, bós que dezis?!

San Pedro — You nun sei cumo deixórun a este santo Manuol Melufa fazer tanto milagre na sue tierra! Nun ye por nada, mas nun ye questume! L que le baliu a el fui l oumbrico que you le botei, senó...

Tiu Jesé — Á San Pedro, çculpai-me, mas a las bezes inda dezis bien baboseiras! Para mi, l que le baliu al rapaç, fui haber-se casado cun aqueilha rapazica. Bibideira, fina, guapa, libaral i agora cun aquel galardon.... You bien le dezie: Melufa, tu séias-me fino, arranja-me ua mulhier pa la bida. Mira, quando you era cuntrabandista, l que me faltou fui ua mulher assi. Se tengo acertado, hoije tenie la maior fertuna de l çtrito.

Tiu Bulmiro — Calhe-se tiu Jesé, el i San Pedro nun sabeis l que dezis. L que le baliu al rapaç fui la mano que you le botei quando tenie la barbarie, senó nun habie cheta para studar.

Tiu Fracisco — You gusto de bos oubir falar, a todos quantos sodes. Quier dezir: antes, l rapaç, cuitadico, naide miraba par’el, parecie que tenie sarna. Agora, que ten ua mulhier pimpona i afamada i que ye rico i conhecido por to l lado, yá todos fúrun ls antuantes de la sue riqueza! Até San Pedro! Se nun fura you, que l’ansinei a conhecer las yerbas... l que serie del!?

San Pedro — You nun sei, mas para mi se nun ten sido l miu ombro.

Tiu Jesé — I torna el cul ombro... Se nun tengo sido you a dezir-le las cousas al miu Melufica...

Tiu Bulmiro — Séiades hounestos. Reconhecei que se nun sou you cula barbarie...

Tiu Fracisco — Calhai-bos que yá meteis nonjo cula cumbersa.

San Pedro — Metemos nonjo?! Tu cuidas que fuste tu?

(Oube-se ua boç off cun eco. Ye la boç de Nuosso Senhor a poner ordre naqueilha giente i naqueilha çcuçon. Todos míran parriba)

Boç de Nuosso Senhor — San Pedro?

Tiu Jesé — I agora, quien ye este?

San Pedro — Calhai-bos, ye Dius que quier falar comigo.

Boç de Nuosso Senhor — San Pedro, lembra-te que stás ne l cielo. Nun stás ne l café a çcutir. Bamos a ber se metes orde nessa giente. Manuol Melufa, deixai-lo. D’agora an delantre acupo-me diretamente you del. Essa comisson d’anjos de la guarda que tenes ende, a partir d’hoije bai a ancarregar-se doutra pessona. Mirai bien, bedes aquel bielho que stá alhi a falar na praça? Yá ten mais de mil anhos. Anda malo, mas inda ten que durar outro tanto.

San Pedro — I cumo se chama l bielho ?

Boç de Nuosso Senhor — L bielho ye la léngua de ls bisabós. L bielho ye la léngua de ls abós. L bielho ye la léngua de ls pais. L bielho ye la léngua de Melufa. Essa léngua yá tan bielha, essa léngua que ye la buossa, chamai-le cumo quejirdes. You chamo-le sendinés i palaçulés i picotés i san martinés de l mirandés.

Tiu Fracisco — Dius sabe falar! Dius sabe mandar! Seia feita la sue buntade. Pa la frente ye que ye l camino.

Tiu Jesé — Bala-me la Birge Santíssima. Agora l que bamos nós a poder fazer por esta léngua que todo mundo giente stá a scamujir ?

Boç de Nuosso Senhor — You yá dixe q’acabou la çcuçon. Quiero esta léngua bien biba outra beç. Quiero un trabalho bien feito i nada de questiones.

FIN

L Barbeiro que dou an Doutor 2

2008-03-18T19:38:00.003Z

quelóquio de Carlos Ferreira

II ATO

(Aparécen outra beç ls apersentadores)

Apersentador — Anton, todo mundo stá a gustar? (Pon la mano na oureilha a modo de dezir que nun oubiu la giente) Nun oubi nada!

Apersentadora — Até parece que sós tu l prencipal !?

Apersentador — Nun sei quien ten mais catarro, se you, se tu!

Apersentadora — Bá, nun metas nonjo delantre de giente.

Apersentador — (diç a modo un segredo baixico) Este segundo ato passa-se ne l anho dous mil i yá bos digo que bai a haber namoro!

Apersentadora — Esto ye solo ambeija de l prencipal! Mas, alantre.
Neste ato, tiu Bulmiro Faca Aguçada, tiu Jesé Saca Miedos i tiu Fracisco Fardela Rota yá se morrírun. Manuol Melufa aprendiu a barbeiro i aprendiu ls segredos de las yerbas cun tiu Fracisco Fardela Rota.

Apersentador — Apuis Manuol fui studando a la nuite anquanto era barbeiro i conseguiu antrar pa l’ounibersidade de medecina.

Apersentadora — Milagre, nun ye cumo tu! Ye un rapaç fino cumo las streilhas.

1° CENA

(Stamos pul meio de Júnio, na rue. Hai bários puiales nua pracica i ye Demingo. Stan uas ties bielhas a filar, i tamien tie Calra, ua tie meio bruxa, que le cháman tie Arrepunsada. Entra Abelhico Bigorilho, que ye un rapaç nuobo, por ende de 19 anhos, bestido de Demingo, mas an moderno, cun çapatilhas i fato de treino de marca.)

Abelhico – Ei tie Calra, a filar nun Demingo!?

Tie Calra – Ei filho, ten que ser, pus que quieres. De mais nun se stá bien.

Abelhico – Nun biu porqui a Manuol ?

Tie Calra – Mas qual Manuol?

Abelhico – Quantos conhece? Manuol Melufa, qual há-de ser!

Tie Calra – Á si, Manuol Melufa! Nó, hoije inda nun l bi. Aposque stará metido an casa a ler ou a screbir ne l cumputador. Diç la mai q’agora nun quier outra bida. Deç que fui pa la deficuldade i cumprou esse traste ... (Entra Manuol) Mira, ende l tenes. Nun se fala ne l diabro sin q’el nun apareça.

2° CENA

Manuol – (diç baixico solo para Abelhico) L diabro ye eilha, i satanás al mesmo tiempo ... Bruxa! (Quando Manuol diç bruxa amostra pa la giente la mano a fazer cruzes)

Abelhico – Ei Manuol, stás buono ? (dan-se ua monzada). Anton essa deficuldade, cumo diç tie Calra. Yá bás listo por astanho?

Manuol – Abilho Bigorrilho! Que tal, home? An que modo hoije tan cedo porqui ? Bamos-mos a sentar neste puial, que tie Arrepunsada nun mos ouba. Nun se puode dezir nada. Stá siempre cul oubido a la cata...

(séntan-se ne l puial, pónen las manos nos zinolhos i ampéçan a cumbersar)

Abelhico — Mie mai hoije fizo-me madrugar, quijo ir al Rechano a ber ua maçaneira san juaneira que tenemos alhá na binha i, cumo eilha nun sabe guiar l trator, alhá tube miu Abílio que ir cun eilha. Apuis de benir, labei-me, comi ua códia i yá quedei jantado. Pula tarde se me dir la fame, como ua tosta ne l café Fuonte Nuoba, q’alhá son balientes.

Manuol — Se me tenes dezido algo, habie you ido cun bós. Mas q’eideia la de tue mai: Maçanas san juaneiras? Mas a esso yá naide liga!

Abelhico — You sei, mas par’eilha, aqueilho ye un mimo. Astanho parece-me que se bai a cunselar. Stá carregadica, até se debelga cun tanta. Diç que solo l cheiro que déixan an casa le tira todos ls males durante meio anho.

Manuol — Mira que nun quiero teimas. S’eilha l diç ... Yá me dezie tiu Fracisco Fardela Rota que balie mais ua maçana san juaneira pocha i chena de brugos, que ua arroba de las cumpradas ne l soto. Outordie, subre esso, stube a ber uas cousas an la anternete ... (Abelhico dá-le ua palmada no ombro i meio a rir-se anterrompe-lo)

Abelhico — Tu stás boubo, Melufa! Antre l que te cuntou tiu Fardela Rota i agora l’anternete, pones-te boubico cun essas cousas de la medecina natural. Acabas cuntigo. Mira mas ye a ber s’aprendes la medecina normal, que yá tenes eidade.

Manuol — Nun t’apoquentes, dá para todo. Sabes, yá screbi quaije que to las receitas pa malzinas q’aprendi cun tiu Fardela Rota i tiu Bulmiro Faca Aguçada, ls mius mestres. Que Dius ls tenga an çcanso. Quiero ber se na faculdade fago un trabalho de fin de curso subre las medecinas tradecionales i naturales i apuis, mais tarde, quando yá stubir formado hei-de fazer la mie specialidade nesso. Mas an Pertual nun sei. Se calha tengo q’ir pa l stranjeiro.

Abelhico — Mira que sterloque. Adonde tu andas metido Melufa! You nun m’anganho muito: bás-te a poner boubico! Agora por fuorça que hás-de fazer l que pormetiste quando antreste pa la barbarie de tiu Faca Aguçada: ser doutor d’ounibersidade, d’yerbas i de cumputador.

Manuol — Á Abilho, tu nun me antendes: mira las bacas boubas, las dioxinas de ls pitos Belgas i outras zgrácias cumo essas. Esto un die ten que stourar. A nós aqui siempre mos tubírun cumo uns atrasadicos, mas daquie por lantre inda bamos a tener muito q’ansinar a la giente de las cidades. Cuitadicos, cada beç tengo mais pena d’eilhes. Parécen almicas sin Sul nin Norte. Por aqueilhas rues... ua tristeza... Parécen perdizes çpaixarinadas ne l tiempo de botar l arbicida a las binhas...

(Abelhico ampeça a dar cul cotobielho a Manuol i este calha-se. Passa por eilhes un grupico de rapazas pimponas que bénen pula rue arriba, todas agarradicas uas a las outras i dében d’ir pa l café. Bótan-le uns oulhos als rapazes, meio rebuoltos. Uns oulhos de rapazas nuobas pa rapazes nuobos a mode dezir: beni cun nós. Mas que stais ende a babar la salsa, tristes?! Abelhico i Manuol ban atrás deilhas, calhadicos, cun ls uolhos, cumo s’eilhes quedássen sentados i ls uolhos fússen atrás de las rapazas. Anton, diç Abelhico pa Manuol.)

Abelhico — Á Melufa, deixa-te agora dessas cousas. Tu nun bés las gaijas?! Aposto que ban pa l café «Fuonte Nuoba». Aqueilha, la Lindaixa, nun era la que t’agradaba? Bamos ambora que bai a ser hoije que l’angatas.

(Albántan-se i ban-se atrás de las rapazas)

3° CENA

(Esta cena passa-se ne l café «Fuonte Nuoba». Hai ua música, desta d’agora, mui alta, a modo batuque, i bárias mesas cun giente nuoba a falar i a buer. Hai ua mesa cun trés rapazas, Lice Lindaixa, Teresa i Albertina, que fálan antr’eilhas.)

Lice Lindaixa — Á Albertina, mas Manuol Melufa adonde anda?

Albertina — Mira que pergunta! Anda ne l mesmo sítio que tu, an Lisboua.

Lice Lindaixa — An Lisboua? You nunca l bi alhá. I l que faç?

Albertina — L que faç nun sei !

Teresa — You acho que anda na faculdade de medecina i a la nuite trabalha, mas nun sei adonde, nin an quei.

Lice Lindaixa — Mas el yá nun yé nada nuobo. Nun há-de ser mui fino.

Teresa — Nun ye fino? Dízen que ye l gaijo mais spierto que se passeia na faculdade de medecina de Lisboua. El yá ampeçou a studar mui tarde. Ampeçou a trabalhar na barbarie de tiu Bulmiro Faca Aguçada i andaba siempre a studar las yerbas cun tiu Fracisco Fardela Rota pa las arribas i a la nuite iba pa Miranda a studar. Dízen que ne l décimo i segundo anho solo nun tubo binte de média porque habie alhá un porsor meio carranha que nun gustaba del.

Lice Lindaixa — An Lisboua!?... Adonde morará?

Albertina — Mas quanta pregunta hoije, subre Manuol Melufa… Nun quieres tamien l telifone del i que le pregunte se yá ten moça i que te marque un ancontro!? Parece-me que andas mui antressada.

Lice Lindaixa — You!?... Nun deixa! Preguntei solo por perguntar…

Teresa — Si, aposque ten bichos! You digo-te la berdade, s’esse rapaç me tocasse pula puorta nun dezi que nó. Un rapaç assi, pimpon, spierto, trabalhador i ... nun sei, mas há-de tener mais cousas buonas.

(Entra Manuol, Abelhico i Pedro Patoixa, ls trés cumbersando i botando ls uolhos a las rapazas, cumo se stuíissen a falar d’eilhas).

Albertina — Ende l teneis. Mirai, Pedro Patoixa tamien ben cul. Se quereis you pido-le para beníren para an pie de nós.

Teresa — Nun penses que solo tu ls conheces. You tamien... (Teresa albanta-se i aceinha cul braço na direçon de ls rapazes) Abilho, á Abilho! Á Pedro, bá a ber se pagais un copo! Sentai-bos aqui cun nós.

(Pedro i Abilho albántan l braço i ban-se todos a sentar na mesma mesa).

4° CENA

(Rapazes i rapazas dan-se beisos. Séntan-se alternando rapaç cun rapaza i Manuol calha an pie de Lice Lindaixa).

Pedro Patoixa — Ei cambada, an que modo bós aqui ? (Albanta-se, albanta l braço, a modo de chamar l duonho de l café para pedir de buer) L que bueis ? Hoije pago you. (Chega l duonho de l café, an pie la mesa) You quiero un çumo de laranja.

Abilhico — A mi trai-me un çumol.

Teresa — You quiero, you quiero, l que quiero? Puode ser un çumo de papaia.

Pedro Patoixa — Ai, que finura! Pa-pai-a!!!

(Teresa faç que le dá a Pedro por este ser caçuador)

Albertina — Para mi puode ser, ... uhmn... un çumo d’ananás.

Lice Lindaixa — You quiero un café i ua garrafa d’auga.

Pedro Patoixa — Á, you auga nun pago! Bás al chafariç de la Calçada i inches-te d’eilha de boca.

Abelhico — Lindaixa ye cousa fina, Patoixa. Tu nun bés q’agora stá pa la capital?! Gente de Lisvoa só veve por garrrafinha.

Lice Lindaixa — Até parece!

Pedro Patoixa — Bá Melufa, yá solo faltas tu pedir. Mira a ber se te decides, se nó quedas a seco.

Manuol Melufa — Staba a oubir-bos a bós. Trai-me un café tamien.

(L serbiente bai-se, Pedro Patoixa senta-se i ampéçan a cumbersar)

Albertina — Anton Manuol, essa Lisboua, que tal?

Manuol — Se you pudisse fazer l que fago alhá, sien salir de Sendin, nun me caçában alhá nó, nin mais un minuto.

Teresa — Anton, nunca biste puli a Lice?

Manuol — (bulbendo-se para Lice) Nun me digas que tamien stás naqueilha tristeza!?

Lice — Stou. Ando ne l quarto anho de Biologie de la Ounibersidade de Ciências. Moro na residença 24 de Júlio.

Abelhico — Bá Melufa, dizes q’alhá conheces pouca giente. Rapazas destas nun debe de haber por alhá muitas. Esta ten chichas que chéiran a Sendin. Aporbeita i pregunta cumo s’entra pa la residença essa, apuis de meia nuite.

(Lice faç que le dá a Abelhico, por este ser tan atrebido, mas Abelhico agarra-le l braço)

Manuol — Falta el por alhá rapazas. Mas cumo las d’aqui yá se sabe que nun son. Ua pessona quaijeque siempre a falar grabe anfada-se debrebe d’eilhas. Mira, nun te pido l código de la residença, cumo diç Bigorrilho, mas gustaba de tener l tou correio eiletrónico, se nun t’amportas.

Pedro Patoixa — Milagre que nun s’amporte! Stás aqui stás a salir un Sr. Doutor, bás a ser un bun partido... Ides a ber q’inda arranjais algun sterloque por alhá; bá! bá! ... (Lice faç outra beç que le dá a Pedro.)

Lice — (Abre l bolso i tira d’alhá un cartonico i antrega se lo a Manuol) You tengo trés direçones eiletrónicas. Neste carton solo tengo dues, mas apuis se quejires dou-te la outra.

Pedro Patoixa — Nun falta nada. Yá te dá todo Melufa. Quanto nun bal andar a studar an medecina.

(Lice faç outra beç que le dá a Pedro. Melufa tira un carton de l bolso i dá se lo a Lice)

Manuol — Nun fagas couso. Aqui tenes l miu correio eiletrónico. Mira, cumo sós de biologie, hemos de trocar uas ampressones subre uas yerbas que hai pa las arribas, a ber se sabes mais do que you.

Abilho — Alhá stá el cun las yerbas. Pantemineiro ! Se fuosse you, ibas a ber anquanto le daba las yerbas. (Lice faç outra beç que le dá a Abilho)

Albertina — Bá giente! Sodes todos mui buns rapazes, mas you yá me bou ambora senó mie mai yá naide l’atura. Diç que quando bengo a Sendin ye solo para andar puls cafés i çcotecas, mas para star cun eilha nun tengo tiempo, i ten rezon.

(Albertina albanta-se para s’ir ambora i ls outros albántan-se todos tamien).

Pedro — You stou cum’Albertina, tamien yá me bou até casa. Anton lougo a la nuite cumo ye? Bamos todos até la çcoteca.

Lice — Bamos, bamos. Tu nun bás Manuol?

Pedro — Buono stá todo mundo d’acordo. Todos aqui antes de las onze de la nuite.

(Sálen todos i acaba l II ato)

(Al anterbalo canta-se la cantiga «Yá t’agarrei afeiçon»)

L Barbeiro que dou an doutor 1

2008-03-10T19:36:00.005Z

L BARBEIRO QUE DOU AN DOUTOR
(Quelóquio an trés atos)

[Screbido pa ls alunos de mirandés de la turma 6°A de la scuola EB23 de Sendin.
Anho scolar de 2000/2001.

Testo yá publicado ne l jornal O Pauliteiro / L Pauliteiro (2001)]

por Carlos Ferreira

FIGURAS

Déixa-se eiqui l nome de las figuras i tamien l nome de ls alunos que las repersentórun, para que se saba.

Abelhico Bigorrilho (João Gamboa)
Albertina (Lisandra)
Antonho Arrasca (Dinis)
Apersentador (Ivo Afonso)
Apersentadora (Ana Maria Patalão)
Bulmiro Faca Aguçada (João Ferreira)
Doutor Manuol (Filipe Xavier)
Lice Lindaixa (Lina)
Manuol Melufa (Filipe Xavier)
Mulhier de tiu Bulmiro (Lisandra)
Pedro Patoixa (Tó-Zé Patoixa)
San Pedro (Dinis)
Teresa (Bruna)
Tie Calra (Iris Brunilde)
Tie Cándida Palomba (Iris Brunilde)
Tie Chana (Bruna)
Tie Maria Concha (Lisandra)
Tiu Antónho Papialgo (João Gamboa)
Tiu Fracisco Fardela Rota (Anselmo Edgar)
Tiu Jesé Saca Miedos (Samuel)

I ATO

(Hai dous apersentadores, bestidos de cerimónia. Ua rapaza i un rapaç.)

Apersentadora — Buonas nuites senhoras i senhores. You sou la apersentadora deste triato.

Apersentador — Buonas nuites a to la giente. You sou l apersentador.

Apersentadora — Oubrigado a to la giente por haber benido. De certeza que nun bos ides a arrepender.

Apersentador — (bolbendo-se pa la apersentadora) Agaba-te cesta. Agaba-te que hás-de ir a la bindima.

Apersentadora — (apuntando pa l apersentador) Bós pensais que el diç esto de la sue cabeça ? Anganhais-bos. El nun tira nada de l sou miolhico. Stá todo screbido ne l papel.

Apersentador — Ye berdade. Mesmo aqueilho que eilha dixo agora stá screbido. I esto que you stou agora a dezir, bós pensais que nó! Tamien stá screbido.

Apersentadora — Deixa-te de pantemineirices i nun digas aqueilho que you yá dixe. Ampeça a apersentar l triato i calha-te. Peste.

Apersentador — (bolbendo-se pa la giente) Alfange. Eilha ten-se na manha. Buono, alantre. Este quelóquio ten trés atos i...

Apersentadora — Calha-te, agora ye la mie beç d’apersentar.
Neste ato stámos trinta anhos atrás. Stámos no tiempo an que l barbeiro era barbeiro, beternário, dentista i doutor.

Apersentador — Manuol Melufa ye l prencipal de l triato. You tamien querie ser, mas nun staba to la giente d’acordo.

Apersentadora — Yá chega de babar la salsa.
Solo bos querie dezir que este aqui ten muita ambeija de l prencipal de l triato. L principal nun ye cumo este, ye Manuol Melufa, ye un rapaç pimpon! Aparece na fin deste ato para daprender a barbeiro. Apuis ateima an ser un doutor moderno, mas sin botar fuora aqueilho que daprendiu culs bielhos.

Apersentador — Agora bamos diretos a la barbarie de tiu Bulmiro Faca Aguçada. Yá ben allhi tiu Jesé Saca Miedos para cortar l pelo.

( La acion passa-se hai trinta anhos a esta parte. Stábamos ne l tiempo an que l barbeiro era barbeiro, beternário, dentista i doutor. Manuol Melufa aparece na fin deste ato i aprende muita cousa culs bielhos, mas ateima an ser un doutor moderno, mas sin botar fuora aqueilho q’daprendiu culs bielhos.)

1° CENA

(Prencípios de Maio. A las uito de la tarde, óuben-se las Trindades nas campanas.
L cenário amostra ua rue de casas antigas i hai ua que ye la barbarie. Hai dues cadeiras de barbeiro i uns talhos largos stribados a la parede, adonde se séntan ls homes anquanto aspéran. Tiu Jesé Saca Miedos, home yá mui bielho, bai a fazer la barba i ben pula rue cun sou caiato, dezindo mal de la salude i de las patas.)

Tiu Jesé – Rais parta las patas, que nun bos mexeis. Que cousicas tan pestes. Solo querie agarrar ua bara i anchir-bos de porradas. Bós solo fazeis l que bos dá la gana, pensais que fazeis caçuada de mi, mas un die destes inda las mamais. Quando andábades pulas arribas ne l cuntrabando stábades mais listas.

( Tiu Jesé entra na barbarie i quando bei que nun hai naide bate a la puorta que stá abierta.)

Tiu Jesé – (chamando i albantando cada beç mais la boç ) Á Bulmiro! Bulmiro! Á Bulmiro! Este tamien nunca stá an casa, nun sei l q’anda a fazer.

( La mulhier de Bulmiro assoma-se por ua puorta que dá para andrento de casa i responde.)

Mulhier de Bulmiro – Buonas nuites tiu Jesé, hoije ben mui cedo!
Tiu Jesé – Cumo bengo mui cedo, se yá rato que dou las Trindades!
Mulhier de Bulmiro – Sente-se ende tiu Jesé, nun quede de pies. Bulmiro fui a arrincar ua muola a tiu Castelhano, que yá nun aguantaba culs delores.

(Tiu Jesé, que ye un cachico xordo, pon la mano na oureilha cumo quien nun oube.)

Tiu Jesé – L quei, Castelhano anda d’amores? Cula sue eidade?!
Mulhier de Bulmiro – (achegando-se par’an pie l’oureilha de l tiu i albantando un cachico la boç.) Nó, you dixe que Bulmiro fui a arrincar ua muola a tiu Castelhano que yá nun aguantaba culs delores.
Tiu Jesé – Castelhano que faga cumo you, que agarre las piernas i que benga a la barbarie. Tomara-me ne l tiempo an que passábamos you i el l riu, nas barbas de ls friscales! Á piernas! Pareciemos galgos! Mas agora por ir a casa, nun deixará de dar buona gáijara al tou home.
Mulhier de Bulmiro – Á, nun deixa, arganeiro cumo el ye… Parece-me que l puchero que tengo al lume yá stá a bufar.

( La mulhier de Bulmiro bai-se para drentro. Apuis, tiu Jesé pergunta an boç bastante alta.)

Tiu Jesé – L quei, bás-te a deitar? Nun antendo esta gentica d’hoije, deitar-se a ua hora destas, inda cun de die! Déitan-se culas pitas! Anda que you uas poucas de nuites andube por outibales sin me deitar . Tenie q’andar anquanto ls friscales drumien.

( Tiu Jesé faç ua mesura cula mano a modo nun antender i a modo deixar passar, cumo s’ampuntasse la mulhier de Bulmiro.)

2° CENA

(Entra Fracisco, home mais nuobo que tiu Jesé.)

Fracisco – Dius le dé buonas tardes, tiu Jesé.
Tiu Jesé – Tubisses benido mais cedo, Fracisco.
Fracisco – Anton!?...
Tiu Jesé – Anton era pastor! Nun tarda a dar las Almas i tu cun las buonas tardes.
Fracisco – Pus anton, Dius le dé las buonas nuites, home!
Tiu Jesé – (tiu Jesé nun oube) L quei ? Come ye l miu nome? Andas bien squecido.
Francisco – Nó. Se nun quier las buonas tardes, pus que séian las buonas nuites.
Tiu Jesé – Buonas nuites mos dé Dius, mas se nun fura esta maldita cámbria que me tulhe las piernas inda podien ser melhores.
Fracisco – Bá, home, nun se queixe, que nun adelantra.
Tiu Jesé – Ls nuobos inda se quéixan mais i cun menos rezon. Agora parécen todos uns pestes que yá nun bálen dues crouas. Ne l miu tiempo, beni you carregadico a chubir las arribas cun pana pa meio lugar, parecie un pelubrino, naide m’ agarraba. Á friscales, nunca me punírun ls uolhos an riba ...
Fracisco – Á tiu Jesé, mas Bulmiro que stá a la spera pa le fazer la barba?!
Tiu Jesé – Fui al Baiunco a arrincar ua muola a Castelhano. Dixo la mulhier que yá nun debe tardar. Ne l die an que bengo you, ye siempre l mesmo cinema. Até parece que l trigo que le dou, ye mais rui que l de ls outros, mas un die destes bou-me a fazer la barba a outra barbarie. Bulmiro yá nun se lembra de la gorrica que le trouxe de Spanha quando inda era garoto, mas mira que a mi inda me lembra cumo se fura hoije.

3° CENA

(Chega Bulmiro i lougo a seguir entra un rapaç nuobo, Antonho Arrasca. Bulmiro trai uas truquesas grandes na mano i uns fierros d’arrincar dientes.)

Bulmiro – Dius bos dé buonas nuites a todos.

(To la giente responde)

Todos – Buonas nuites mos dé Dius.
Tiu Jesé – Á Bulmiro, anda que Castelhano agarra-se por mais fuorte que naide, mas desta beç inda le tremiu la paxarina quando te biu las truquesas.
Bulmiro – Nó, nin assi. Nin dixo ai nin ui! I mire que la muola era un cantabouço, que me bi an calças de mexer pa le arrincar la raiç. Parecie la muola dun burro. Staba pocha i yá lebaba l carrielho todo cumbanido.

(Bulmiro agarra l xabon i l pinzel i ampeça a fazer scuma nun copo d’aluminio)

Bulmiro – Bá ! A quien le toca la beç ?

( Tiu Jesé sentando-se na cadeira de barbeiro )

Tiu Jesé – Bá! bá! Çpacha-te. Corta-me estes quatros pelos i faç-me la barba, que me quiero ir ambora.
Bulmiro – Aposque ten muita priessa!? Nun deixa d’inda ir esta nuite até Fermeseilhe a buscar uas alparagatas i uas tejeiras pa la poda.
Tiu Jesé – Mira que gana nun me faltaba, mas estes almaneches de las piernas yá nun m’ajúdan. Anda meneia-te i aguça-me la faca, pasmado.
Bulmiro – Puode ser que l’aguce tanto q’apuis corte eilha sola ... (diç Bulmiro meio anrabiado anquanto fazie l gesto de le cortar l cachaço)
Fracisco – Á Bulmiro! Nun me digas que t’anrábias quando te cháman «Faca Aguçada»?!
Bulmiro – (meio altarado) Mira Fracisco, tu gustas muito que te chámen «Fardela Rota»? I el, tiu Jesé, gusta muito que le chámen tiu «Saca Miedos»?
Fracisco – Bá, home nun t’anrábies, q’inda cortas l tiu.
Tiu Jesé – Tu nun oubes, á Bulmiro, a mi yá tanto se me dá, you agora de bielho, yá nun meto nin saco nada. Se m’agarrasse de 25 anhos! Á guardicas ...

(Nesse antretiempo Bulmiro pon ua toalhica al redror l cachaço de tiu Jesé i ampeça a botar l xabon na cara cul pinzel. Quando yá staba la cara toda anxabonada, assoma-se tie Chana a la puorta de la barbarie, mui apressiada i mui aflegida .)

Tie Chana – Á Bulmiro! Tenes que benir debrebe a ber l miu Antonho que stá mui malico na cama. Bai a ser ua permonia galopante. Ten un febron tan fuorte q’até queima! Se nun l fazes ua sangrie yá, acho que nun tarda an se morrer.

(Tiu Jesé nun oube bien i diç.)

Tiu Jesé – L quei? L tou home nun para de buer? Deixa-lo buer mulher...
Bulmiro – Nó, tiu Jesé, l home stá-se quaijeque a morrer. Parece-me que nun bai a ser hoije que le bou a fazer la barba.
Tiu Jesé – Esso sei-lo you. Mas que nun metes un rapaç que querga aprender l oufício? Tu nun puodes dar aguanto a todo: barbeiro, dentista, beternário, doutor i sei alhá que mais ...
Fracisco – Esso ye berdade.
Bulmiro - (bolbendo-se pa Tie Chana) Baia andando que you nun tardo. (Apuis buolbe-se pa Fracisco ) Á Fracisco, inda tenes an casa daquel remédio que fazes cun cabacas de nebro? L outro que me deste fui remédio santo, curou ua permonia galopante a tiu Burreca i you pensaba que l tiu yá iba a lebar camino.
Fracisco – Acho q’inda há-de haber algun ... Mas quieres-lo yá?
Bulmiro – Nó! Bás-lo a buscar quando l tiu stubir muorto!
Fracisco – Buono, bai andando, que you yá bou por el.
Tie Chana - Dius há-de-te pagar, Fracisco. I tu, Bulmiro, nun tardes, senó chegas alhá i yá nun sirbe de nada.
Tiu Jesé – Anda que sin lebar la faca bien aguçadadica nun bai.
Bulmiro – El yá ampeça a meter noijo cun essa cumbersa.

(Bulmiro sal apressiado i deixa la barbarie.)

4° CENA

( Entra Manuol, cháman-le Manuol Melufa, un rapaç nuobo, cul pelo grande, i bai dreito al outro rapaç nuobo, Antonho Arrasca. Nun diç nada i dá-le ua monzada.)

Tiu Jesé – Cambada de murmosos, yá nun son capazes de dar las buonas nuites. Tal un, tal outro. Mira ... Este yá cacho que staba aqui i inda nun se l’oubiu ua palabrica. Pestes! Dában para ir pulas arribas de nuite, a passar l cuntrabando! Nun habie friscales que ls oubíssen.
Fracisco – Hoije l mundo stá assi, que s’há-de fazer!
Tiu Jesé – Mira, mira que lindo ye, culas celras! Ai la melufa! Inda há-de haber un que t’há-de agarrar por ua rapaza.
Antonho Arrasca – Mira Manuol, acertou-te cul nome. Anda-te, l tiu sabe quatro!
Manuol – Agárran-me por ua rapaza… I apuis, acaba-se l mundo?
Tiu Jesé – Calha-te, calha-te q’até metes noijo. Rapazicos d’agora ...
Manuol – I ne l buosso tiempo cumo érades ? Se calha inda érades piores...
Tiu Jesé – Inda porriba respónden. Bá! Yé melhor calhar-me senó la cumbersa inda bai loinge ... Barba inda nun tenes, a ber se ben Bulmiro que te corte l pelo.
Manuol – Nun há-de ser agora. Hoije solo bengo a falar cun tiu Bulmiro a ber se me quier para sou ajudante, quiero aprender a doutor.
Tiu Jesé – Doutor? Doutor de quei? Doutor de scanho feito á lareira? Ou anton cerjano sin conhecer las yerbas? Mete-te mas ye de cuntrabandista que agora ls guardas yá nun préstan.
Manuol – Pa doutor de leis yá chega el. Las yerbas quien ten que me las ansinar ye tiu Fracisco. Diç que sabe fazer uns remédios milagrosos. L cuntrabando hoije yá nun dá, ls tiempos son outros, tiu Jesé.
Fracisco – Pa aprender a doutor bás pa la ounibersidade, q’aprendes melhor.
Manuol – El bien fala, mas mie mai adonde ten las notas? De qualquiera maneira an l’ounibersidade saberan muita cousa, mas nun sáben l segredo de las yerbas cumo el sabe. Mas un die inda hei-de ir par’lhá.
Fracisco – Buono, you bou-me a saber de l miu remédio. Até manhana tiu Jesé. Até manhana rapazes.
Manuol – Á tiu Fracisco, puodo ir cun el solo para ber cumo ye l sou remédio?
Fracisco – Ó home, por esso que nun seia.
Manuol – (para Antonho Arrasca) Bá, adius, Arrasca. Tu inda quedas? You yá me bou cun tiu Fracisco.
Antonho Arrasca – Adiós Melufa. You tamien nun m’hei-de fazer mui bielho.
Tiu Jesé - Hoije parece que yá nun fago la barba. (Buolbe-se pa las piernas i amanaça). Bien feita pa las piernas! Manhana heis-de tornar, solo para nun serdes malucas i perguiceiras. Anda que you bos coço! Anda que se benisse un friscal atrás de bós, íbades a ber cumo meniábades la pantorrilha ...

(buolbe-se pa l outro rapaç i ampeça-le a cuntar, ua partida que le passou ua beç an Spanha.)

Tiu Jesé – Tu nun oubes, ua beç an Spanha, serie ende por este tiempo, tenie ido you a buscar dues dúzias de fouces para un tiu rico de Dues Eigreijas, acho que era tiu Zambeira, i yá te bou a cuntar la partida que me passou.
Antonho Arrasca – Á tiu Jesé, agora nun tengo bagar de l oubir que tengo la mie moça a la spera!

(Antonho Arrasca sale i deixa a tiu Jesé solico.)

Tiu Jesé – Moça, nun deixará ... Mas quien quier esto, Arrasquita anrascado!? Inda se fusse cuntrabandista i traisse uas alparagatas...

(Ban-se todos ambora i acaba l I ATO. Canta-se la cantiga «L remanse de Jesé cuntrabandista»)

L Beneno de Moriana 3

2008-01-25T19:33:00.000Z

Noticas de Antroducion a L BENENO DE MORIANA, quelóquio an un ato

1. Este pequeinho quelóquio fui screbido a pedido de l Dr. Xavier Martins, persidente de la Associação Micológica A PANTORRA, para ser repersentado por alturas de l’assemblé giral dessa Associaçon, an Nobembre de 2005. La rezon de l pedido tenie a ber culas refréncias a roques, cuncretamente al resalgar [amanita muscaria], que aparécen ne ls remanses chamados Beneno de Moriana.
Ne l anho atrás, 2004, you habie feito ua palhestra que apuis fui publicada na rebista de l’Associaçon cul títalo «La amanita muscaria i ls remanses «veneno de moriana”: notas para ua perpuosta de nuoba lheitura». Ende se busca ua nuoba lheitura daquel remanse popular, cun assento nas propiadades de l roque amanita muscaria, neilhas assentando ua splicacion pa las dues çfrentes bersiones de la fin de l remanse.
L quelóquio fui screbido oureginalmente an mirandés, mas fui apuis puosto an pertués para poder ser repersentado puls alunos de la Scuola Secundaira de Mogadouro. Esta repersentaçon nun se chegou a dar por falta de tiempo para ansaiar. Algues falas que fazien ua refréncia a la Pantorra fúrun cortadas nesta bersion que agora sal a público pula purmeira beç.

2. Ls remanses conhecidos cumo Beneno de Moriana, aperséntan-se an bárias bersiones, l mais deilhas arrecolhidas an Trás ls Montes i eiqui mui populares, mas cun çfrentes nomes. Stan antegrados na categorie de remanses chamados «das mulheres assassinas», adonde tamien se debe de meter A galharda, A vingadora da sua honra e A serrana [1].
L tema parece simples: la mulhier rejeitada, sustituída por outra, binga-se ambenenando l home. Assi i todo, l resultado conhece dues bersiones defrentes: ua, la mais quemun, an que la mulhier mata l home cun beneno scundido nun copo de bino; la segunda, coincida cumo «final madeirense», anque tamien tenga sido arrecolhido hai mui pouco timepo ne l cunceilho de Benhais, parece dar a antender que l home nun se muorre, mas que haberá ‘rucecitado’ apuis de star alguns dies anterrado ne l huorto de la matadora. Mas hai que dezir que nun se quier eiqui studar esse remanse, yá que l oujetibo ye antroduzir al quelóquio que agarra esse remanse cumo punto de salida [2].

3. Inda que se agarre la cuonta que stá por trás de l remanse tradecional, reproduzindo-la eiqui an buona parte, l quelóquio trata essa cuonta cumo la cristalizaçon dua rialidade aterna: l amor. Deste tema central sálen outros mui bariados: l ódio; la bingança; l çprézio de ls fuortes puls fracos; la rejisténcia de ls fracos an relaçon als fuortes; la lhibartaçon de la mulhier; la tentatiba de domínio de fuortes fuorças scundidas para apoiar ls deseios houmanos; la berdade i la mintira nas relaçones houmanas, etc. Lhigado cun aquel tema central, hai un outro que atrabessa todo l remanse: la lhibardade i ls lhemites de la decison andebidual. Assi, anque la cuonta cuntada ne l remanse se passe nua sociadade mediabal, eilha tem ua dimenson antemporal que le dá ua grande atualidade. Ye por esto modo de ber las cousas que passa la ourdidura de l quelóquio i zdende mais bien puoden ser antendidas i anquadradas las refréncias, a la purmeira bista sien sentido, que neilha éntran.

4. La marra temporal, que l CORO de ampeço pon antre un normal telejornal de ls dies de hoije i la guerra de Troia, quier antroduzir a la bruta l tema antemporal que bai a ser tratado i amostra lhougo l geito de cumo bai a ser tratado. Nun bai i ben de tiempos çtintos i nun subreponer de registros lhiterairos, adonde l dramático i l trágico altérnan cul lhírico i este cul satírico i, até, cul burlesco. Deste juntouro quier-se, cumo resultado, ua acion çcolada de l tiempo, dun tiempo cuncreto, anque sien deixar de benir arriba an tiempos çfrentes.

5. Tube specialmente na eideia ls alunos de las scuolas, que puoden repersentar la pieça. Anque sien abaixar a pedagogismos, faç-se por chamar l’anteligença na neçaira çcustrucion de l testo, sien miedo de passar duns registros lhietrairos a outros, duas formas a outras. L jogo de cunstrates, la lhenguaige i sintace ousadas, algue çuça poética, a las bezes rimada, la aposta nua simbologie cénica que faga falar l silenço ou baia para alhá de las palabras – son alguns de ls recursos ousados. Dende tamien se quier fazer subressalir la polissemie social i andebidual de l tema de l amor: apaixonado/boubo, dramático, trágico, redículo, mintiroso, bingatibo, criador, adominador, etc. Outro sentido nun se quier de la fin cun dous caminos possibles quanto al çtino de D. Jorge i als sentimientos de Juliana: la muorte ou la rucerreiçon, la bingança ou l deseio, quien bai a ganhar? An giral, todas las repuostas son possibles, mas solo andebidualmente puode ser scolhida ua cuncreta repuosta: acaba por ser la lhibardade de cada un a decedir, a amponer-se cumo balor mais alto, mesmo an relaçon al amor.

6. Cunta-se cula buona colaboraçon de ls regrantes / porsores na splicaçon de l testo i de las bárias matrizes stóricas que stan por trás del ou le dan forma. Cuido que esta puode ser ua buona oucasion para antroduzir ls alunos ne l remanseiro tradecional, antre outras motibaçones pedagógicas que l testo puode traier.
Al regrante, inda que se déixen mui menudas andicaçones, deixa-se lhibardade bastante, a nun ser quanto al testo, que se quier sien mudança. Quaije todos ls Quadros muito ban a depender de l uolho del. La moda de las cantigas deixa-se a scuolha lhibre, a nun ser quanto al remance cantado na fin, yá que eisiste grabaçon publicada de bárias anterpretaçones, habendo inda na tierra de Miranda quien l conheça bien, cul nome de D. Ougenha, Juliana i outros.

Lisboua, 5 de Outubre de 2005
Fracisco Niebro

[1] FERRÉ, Perre, org., (2003), Romanceiro Português da Tradição Oral Moderna, III volume, pp. 220 ss., ed. Fundação Calouste Gulbenkian, Lisboa.
[2] Remete-se pa l que screbi an FERREIRA, Amadeu (2004), La Amanita muscaria i ls remanses «Veneno de Moriana»: Notas para ua perpuosta de nuoba lheitura, A Pantorra, rebista de la Associação Micológica A Pantorra, Mogadouro, bel. 4, pp. 27-38. Ber tamien la bibliografie ende amentada.

L Beneno de Moriana 2

2008-01-24T01:25:00.000Z

Beneno de Moriana

Quelóquio an un ato

de Fracisco Niebro

(cuntinaçon)

4º QUADRO

(Juliana solica na sala. Stá sentada a ua mesa que ten bárias cousas sparbadas porriba: yerbas, frascos, saquicos, cousas bárias que téngan a ber cul mundo de la bruxarie i de l encantamiento. Tamien antriba la mesa stá, bien a la bista, un caramono repersentando a D. Jorge).

JULIANA

(Agarra las cousas ua a ua, mira-las i bai l nome, cumo quien lei lhetra a lhetra.)

Quelobricas nuobas ...

Puolos de lhagarto rial ...

Oulhos de sapo...

(Mui debrebe.)

Unto de queluobra, sangre de queluobra, spina de queluobra, camisa de queluobra, diente de queluobra ...

(Cun fuorça)

Nó:
sangre de bíbora, puolo de lhagarto molido.

(Al modo que bai dezindo cada palabra, apunta la cousa al caramono ou dá-le cun eilha, de modo que l caramno se caia i seia seia albantado por bárias bezes. )

Yá biste, D. Jorge, que dote tengo para te dar?

(Dá fuortes risadas, anquanto agarra l caramono i le aperta l cachaço.
Apuis, serena, mirando par’el sien zbiar ls uolhos.)

Ai D. Jorge!, se soubiras cumo queima esta bingança...
Para que quedas ne l mundo, se se derretiu l miu mundo?

(Agarra la mesa i las cousas i atira cun todo al suolo. Apuis bota-se parriba de las cousas a chorar cumo ua Madalena.

Un ratico apuis entra la Bruxa. Ye ua bruxa moderna, moça, mui bien bestida i maquelhada. Tai cun eilha ua mala mui, mui grande.

Dá la buolta a la sala mirando para Juliana i rindo-se. Apuis abre la mala.)

JULIANA

(Deregindo-se a la bruxa)

Porque tardeste tanto?

BRUXA

Questumo dar cunsultas an casa. Eiqui ye mais caro.

Bamos-mos a çpachar que deixei l carro mal stacionado i as multas ándan pula hora de la muorte.

JULIANA

Çcansa que l carton de crédito stá bien caliente.

Inda agorica tube de spulsar deiqui trés bancos que me querien meter mais trés cartones de crédito a la fuorça, cula eideia de que la purmeira prestaçon era de grácia i que sorteában ua biaije a la lhuna ou nun sei bien adonde.

(Renhendo)

Que me trais?

BRUXA

Cartas...

JULIANA

(De risa)

Cartas d’amor...

(Boziando)

Nó!

BRUXA

La mie bola de cristal...

JULIANA

Deixei de ver.

BRUXA

Estes cumpremidos amaricanos que merquei eilhi na staçon de serbício.

JULIANA

Nó.

BRUXA

Dizes-me l que quieres?

JULIANA

Muorte ... sangre... bingança… la paga…

BRUXA

Nun sou dessas, nien tengo poderes para tanto.

Yá me biste na cadena culs guardas i ls juízes todos an grebe? Libra!, que nien l almuorço me lhebában!

Abiso-te de que solo uso material de l mais moderno.

Sou ua bruxa moderna, si senhora, cun muita honra. Cumpetente i cun ua prodetibidade arriba de la média de l paíç.

Nun sou daqueilhas que ambárcan na superstiçones ouscurantistas.

(Amostra-le ua rebista)

Stan eiqui las tendéncias anternacionales de la arte para este staçon.

JULIANA

Bai-te i deixa-me culs mius remédios.

Males mius, remédios mius.

(Boziando i apuntando la rue cul dedo sticado.)

Bai-te ambora i manda-me la cuonta.

(La bruxa torna a cerrar la mala, de qualquiera maneira, i sal. Juliana cuntina a remexer nas cousas spalhadas pul suolo. A cada cachico, bai dezindo an boç mui alta.)

Estas bruxas d’agora são uas ancumpetentes! Ne l tiempo de mie bó de las saias ye que era... Yá nun se bei por ende quien saba andar a bolar anriba de bardeiros...

Formaçon ye de l que eilhas percísan todas! De un bun xoque tecnológico!

Falta de produtebidade assi nunca se biu.

Ye l que dá la falta de cuncorrença.

Apuis, q’admirança steia na mala cumpanhie nas statísticas anternacionales.

(A cierta altura agarra un frasco cun puolo andrento i lei ls dezires. Streforma-se, cun un brilho ne ls uolhos)

R-e-s-a-l-g-a-r!

(Lhebanta-se mui debrebe, sal i torna lhougo a antrar cun un lhibro. Çfolha l lhibro a saber de algo i quando l acha, lei.)

Resalgar, roque que dá pul nome ciantífico de «amanita muscaria», coincido por «matamoscas». “A la sue chicha ye branca, sien cheiro, que pon un a ber pantasmas i algo a modo de droga. Tamien puode porbocar fuortes delores de barriga.”

(Mui debagarico, como quien pensa, contina a ler)

Sien cheiro… Eiceliente!

“Alucinogénio” i “narcótico”, quier dezir que pon un fuora de sou juízo i a drumir. Inda melhor!

Puode traier grandes delores de barriga, de angatar pulas paredes. Eiceliente!

(Decidida)

Ye esto que me faç falta.

Mais uns policos de queluobra, lhagarto molido, sangre de bíbora.

Desta nun se scapa.

(Cuntina a ler l lhibro an silenço i fala cumo quien faç comentairos ou un resume de l que lei)

Tem grácia, diç eiqui que, hai miles de anhos, até buien l meijo de ls que habien comido reslgar. I que podien quedar até 15 dies a drumir…

Que grande pedrada!

Cousa de cujidade: acraditában que ponien las pessonas na lhigaçon cul outro mundo, que era ua mágica de ls diuses.

Ye desto mesmo que you perciso.

(Anquanto b a saber dua garrafa)

Ye desto mesmo que you perciso.

(Apuis, ressaltando cada letra)

R-e-s-a-l-g-a-r!

(Agarra ua garrafa de bino i bota alhá bárias cousas, al mesmo tiempo que bai dezindo)

R-e-s-a-l-g-a-r!

(Sal, lhebando la garrafa de bino para andentro de casa.)

wwwwwwwwwwwwwwwwwwwwwwwwwwwwww

5º QUADRO

(Entra Juliana i bai-se a assomar a la jinela)

JULIANA

(A la jinela)

Ben ende l D. Jorge.

(Arrecuolhe-se, arrima mui debrebe la sala i cumpon-se.

Torna pa la jinela)

D. JORGE

Guapa Rosa, Juliana!

JULIANA

(Anquanto le stende la mano a beisar)

D. Jorge, séiades bienbenido.

Agorica mesmo me l dezírun: stais bien pronto para bos casardes!?

D. JORGE

I you bengo-bos a cumbidar.

JULIANA

Dius bos lhiebe al cielo, D. Jorge:

Tan grande ye l buosso merecer, que bien feliç heis-de ser.

Yá que an buona hora cheguestes, bamos alhá a comemorar.

D. JORGE

Çculpai-me Juliana, que nun me puodo tardar.

Manhana ye la boda i tengo de me cunfessar.

JULIANA

Antrai, antrai que nun tarda nada.

(D. Jorge entra)

Este bino you bos guardei, solo para bós i mais naide.

D. JORGE

(Mirando pa la garrafa, anquanto Juliana bai anchindo l copo)

Ah! Ua bielha reserba cumo hai muito you nun bie.

Inda hai dies me dezírun que s’habie sgotado ne l mercado.

(Juliana passa-le l copo cun bino)

Que d’hoije nun anho, Juliana!

(Bebe l bino)

Nunca te perdi de la sprança.

A las scundidas bengo-te a ber.

(Piçca-le l uolho)

Depuis ...

(Ampeça a agoniar-se)

Depuis... … …

(Bota las manos als uolhos)

Ai que me falta la lhuç als uolhos.

(Agarra-se a la barriga)

Ai que yá me bou a agmitar!

(Arrebolca-se ne l suolo.

Apuis de algun itempo)

Que poniste Juliana, que boteste neste bino?

JULIANA

(Pon-he un pie anriba)

Inda te quieres casar?

D. JORGE

Que poniste nesse bino?

Malbada!

Ai que me muorro!

(Cuntinua a arrebolcar-se, nas gárias de la muorte.)

JULIANA

(cun grandes risadas i andando al redror de D. Jorge caído ne l siuolo)

Bamos antoce a ber se nun me squeci de nada:

R-e-s-a-l-g-a-r.

Quelubrinas nuobas... puolos de lhagarto rial... sapo...

Mais r-e-s-a-l-g-a-r.

Unto de queluobra, sangre de queluobra, spinha de queluobra, camisa de queluobra, diente de queluobra.

Outra beç r-e-s-a-l-g-a-r.

Sangre de bíbora, puolos de lhagarto molido… este yá l dixe.

Apuis mexi todo bien mexido cun resalgar ambolbido i… quedou pronto a serbir … friu... friu ...

D. JORGE

(Tembrando)

Ui que friu!

(Risada de Juliana.)

(Don Jorge mexe-se muito i acaba por se morrer)

wwwwwwwwwwwwwwwwwwwwwwwwwwwwww

6º QUADRO

(Éntran ls anterradores i lhieban a D. Jorge a anterrar. Ban todos andando alredror de la sala cun D. Jorge muorto, agarrado pulas piernas, braços, cabeça, corpo, cumo un cadabre. Forma-se, assi, ua peciçon cun de pantasmas alredror de la sala, siempre andando alredror.)

JULIANA

(Corre cumo bouba alredror de l cadabre que ye lhebado i bai preguntando, sien parar, ua beç a un outra beç a outro. Naide le responde, cuntinando la peciçon cumo se nada fura.

Este quadro eisige algun amprobiso i ye de duracion que premita amostra l’antensidade i la cuntradiçon de ls sentimientos de Juliana, assi cumo la ambiguidade quanto al modo de la situacion acabar.)

Morriu-se?

Nó!

Morriu-se, morriu-se!

Si?

Achas que vai a spertar?

Bou-me a guardá-lo bien guardado.

Para que l quieres Juliana?

(Cuçpe-le anriba)

Tan galano que el era…

(Gritando)

Arde nas perfundas de ls einfiernos!

CORO DE LS ANTERRADORES

Si.

Nó.

(Estas dues palabras son dezidas sien parar i alternado antre eilhes, dezidas sincopadamente, bariando la altura de la boç. Sirve de fondo a las falas de Juliana.)

wwwwwwwwwwwwwwwwwwwwwwwwwwwwww

7º QUADRO

(Cuntina l corteijo de ls anterradores alredror de la sala)

CORO DE LS ANTERRADORES

Ban-se perdendo
las seinhas cun que marcamos
ls dies,
ls géstios que mos fázen.
Siempre parece que l mundo naciu agora mesmo.

OUGÉNIA

Para adonde bamos? Quien mos lhieba?

JULIANA

Cumo eiqui cheguemos?

CORO

Yá nun sabes, Juliana.
Nunca sabes.
Solo nunca pára la busca de las pantasmas que tórnan
cun Heilena a sue rica cama frie.

OUGÉNIA

Para adonde vamos? Quien mos lhieba?

JULIANA

Cumo eiqui cheguemos?

CORO DE LS ANTERRADORES

Abánçan ls barcos sien farol que ls guie pula nubrina de ls dies.
Juliana bai al timon, que la scuma le ancubre la berdade.

Quien bózia de la borda?
Squece-lo que
siempre ne l alto mar te buscas.
Adonde te lhieban las bóias de
sangre que respiras?

Que rucerreiçon persigues?
Torna Juliana al tou bordado de
Ambisibles filos, que l miedo
te zafia siempre ne ls caminos.

(cai l panho)

wwwwwwwwwwwwwwwwwwwwwwwwwwwwww

8º QUADRO

(Entra um CIEGO a tocar i ACUMPANHANTE a cantar l remance “Beneno de Moriana”, na bersion mirandesa “Dona Ougenha”, tal cumo aparece ne l Cancioneiro de Serrano Batista (p.23), arrecolhido na aldé de Malhadas, an 1938.

Todas ls figurantes óuben i ajúntan-se al cantar.)

Abaixa-te ah cabalheiro
que hemos de merandar.
- Tu que tenes, Dona Ougenha
guardado para me dar?
- Tengo bino de siete anhos
guardado para te dar.
Alhá no meio de la bubida,
ampeçou-s’agoniar.
- Dona Ougenha, Dona Ougenha,
que boteste neste bino?
- Botei-le unto de queluobra,
i un resalgar molido.
Tengo l cabalho na reata,
yá nun beio l miu rocino.
Cuitadicos de ls mius filhos
que quedórun sien arrimo!
Cuitadica de mie mulhier
que queda sien sou marido!
- Pa que sabas cabalheiro,
l que que tenes pormetido:
Palabra de casamento
muito bien ancubrido.

FIN

L Beneno de Moriana 1

2008-01-23T15:52:00.000Z

L BENENO DE MORIANA

Quelóquio an un acto

Por Fracisco Niebro (2005)

Figuras:

Juliana
Ougénia
Rosica
Ti Ana
Bruxa
D. Jorge
Coro de ls Tontos
Coro de ls Anterradores
Ciego
Acumpanhante de l Ciego

wwwwwwwwwwwwwwwwwwwwwwwwwwwwwwwww

CORO DE LS TONTOS

(Trés pessonas, al menos. Cada ua diç la sue parte, a nun ser la purmeira i la última, que son dezidas pula mesma pessona)

1ª.

(Apersentador(a) de Telbison)

Atencion senhoras i senhores.
Bou-bos a ler uma nobidade que saliu onte nun jornal, por ende, na qualquiera parte de l mundo:

«Mulhier mata l home, sien que naide podira fiturar par’ende. Ándan agora a saber la rezon desse crime».

A la nuite, anquanto l sangre scuorre de ls telejornales, las pessonas ban palpitando: haberá sido a machadada?, cun beneno?, solo un daqueilhes mirares que mátan?

La faladora de la telbison, cua risica doce, anúncia que será apersentado l quelóquio «Romeu i Julieta», de William Shakespeare, lhougo apuis l telejornal.

2ª.

(Figura de l triato griego, bestida cun einauga branca até als pies i cun maçcarilha – persona)

Culs cadabres ancarramelados an pie las muralhas de Troia
als pies l altar de Atena,
passeia a guapa Heilena la sue risa
porriba ls uolhos, yá bidrados, de l grande príncepe Heitor.
Pul cielo cerrado,
arródian ls alcaforros sue selombra
a atiçar la boubice de Cassandra.
Nesse mesmo sfergante, çpara
Porriba ls picos de las Eigeias Ilhas l facho de la bitória de ls Aqueus.
Quien há de buer l sangre de ls heirois??

(Todos)

Un die, todo ampeça para ti.
Nun sabes cumo, angulhe-te un fernesin de abandono.
Yá nun mides l tempo, que
l mundo te naciu agora mesmo, branco, baziu.
Quédan las preguntas:
cumo se fizo hoije?
cumo cheguemos aqui?
que pequeinhos géstios se ancarramelórun ambaixo ls nuossos miedos, ls nuossos balores, ls nuossos dreitos, la nuossa denidade … la nuossa merda?

1ª ou 3ª.

Atencion senhoras i senhores, oubi:
la guapa Juliana chegou.
Feliç … que inda nun ye de nuite nien hai telejornales…

wwwwwwwwwwwwwwwwwwwwwwwwwwwwwwwwww

1º QUADRO

(Oube-se ua moda.)

Ai, l miu amor
cumo me tarda!
Ai, muito sufre
quien muito aguarda!

Pássan dies, mas son anhos,
I l miu amor sien passar:
amores, séian anganhos,
stan-nos, cun bida, a matar.

Nien l sol a meidie
me deixa mais nada ber:
que l amor quando porfia
cun bida me faç morrer.

(Abre l panho ou lhuzes. Sala de la casa de Juliana. Stá sentada a bordar, acumpanhada por Ougénia, amiga i cunfidente.)

OUGÉNIA

Nun sales de casa, Juliana ...
Biras cumo las campaninas yá amarielhan ls cerrados
i drobaries
las selombras desta sala.

(Silenço)

Oubiste? Yá nien cumigo cumpartes
L tou bordar, essa tela que nien Penélope te poderie dezir cumo acabar.

JULIANA

Nun t’oufebdas Ougénia: que me dizes deste berde?

(amostrando l bordado)

Yá l troquei mil bezes i siempre me aparece baço.

OUGÉNIA

Nien
esta linda Primavera t’anima.
Bien
diç tue mai que malo oulhado agarreste.

JULIANA

Para que quiero la Primabera?
Nun dízen que ye l tiempo na que todo nace?
A mi yá me naciu quanto querie.
Deixa-me, antes, mirar l caminho, que
gusto de ber quien ben.

OUGÉNIA

(Bai a la jinela)

Ben Rosicanha fugindo.
Trás deilha nun bem naide.

JULIANA

(Lhebantando-se i indo tamien a la jinela)

Recado para mi trairá?

(Boziando para Rosica)

Stou eiqui, Rosica.
Ben!

(Para Ougénia)

Bai tu a la puorta Ougénia.

OUGÉNIA

Serena-te Juliana,
que l mundo todo
te bei,
que l mundo de ti
solo fala.
Nun t’ansinei a bordá-lo, a prendé-lo nas tues manos?
Nun l perdas, que te perdes...

wwwwwwwwwwwwwwwwwwwwwwwwwwwwwwww

2º QUADRO

(Entra Rosica, mal sendo capaç de resfolgar de cansada)

ROSICA

Ai!
Ai!
Ai menina Juliana!

OUGÉNIA

(Abanando Rosica puls ombros)

Zambuxa mulhier!

ROSICA

Ai menina Juliana!

(Achega-se a Juliana, agarra-se a eilha i diç-le algo an segredo al oubido. Juliana queda mui parada, sien ser capaç de dezir nada. Rosica i Ougénia ajúdan-la a sentá-se).

OUGÈNIA

(Renhendo cun Rosica)

Que amboras le traiste, Cuorbo de l Eigito?!

(Juliana queda-se, caiendo de la cadeira)

ROSICA

(Boziando, anquanto Ougénia bai a amparar Juliana)

Acudi!
Á Tie Ana, acudi, que la buossa filha tubo un xelique!

OUGÉNIA

Calha-te, zgraciada i bai-se debrebe a buscar un copo d’auga.

(Rosica sal a correr. Ougénia manten Juliana segura pula cabeça i faç-le fiestas na cara, an silenço. Apuis canta la moda, anquanto arrolha Juliana)

Nien l sol a meidie
me deixa mais nada ber:
que l amor quando porfia
cun bida me faç morrer.

(Juliana sperta de l sou zmaio i mira, ls uolhos perdidos, al redror. Apuis abraça-se a Ougénia)

wwwwwwwwwwwwwwwwwwwwwwwwwwwwwww

3º QUADRO

(Entra Ti Ana als bózios. Cun eilha bem Rosica, que trai um copo cun auga)

TIE ANA

Mie felhica... Mie felhica...

(Falando para Rosica)

Dá acá.

(Lhieba l copo as lbeiços de Juliana)

Pronto... Pronto...
Agora bás a çcansar.

(Falando par a Ougénia)

Bai cun eilha, Ougénia.
Lhieba-la pa l quarto.
Nun la deixes, que un remolino de boubadas le stá a baleiar la cabeça.

(Ougénia ampara Juliana i dambas a dues sálen de la sala)

TIE ANA

(Para Rosica, que stá cheia de miedo)

Que demonhos le solteste,
i que you te mandei adominar?

ROSICA

Çculpai-me Tie Ana, mas eilha staba a la janela ...

TIE ANA

I tu mortica por achá-la!

(Cun mala cara)

Que soubiste, ne l palaço, puls criados de l D. Jorge?

ROSICA

Criados?
Nun se fala noutra cousa, que até you quedei feliç.

L D. Jorge bai-se a casar, mas nun ye cun buossa filha.
Yá de la boda stan a tratar.
L altar ye lhino branco, l mais fino.
Guapos cabalhos bien tráien muitos moços i muitas moças.
Yá se alúgan las jinelas para l pobo ls ber passar.
Na praça férben apostas: que pítula nacerá, será nino ou será nina?

Que pena la telbison inda star por ambentar...

TIE ANA

(Cun mala cara)

Chega!
Quien ye eilha?

ROSICA

Dízen que an rica i nobre nun le ganha, nó, D. Jorge.

(Anternecida)

I tan galana...

TIE ANA

Calha-te!

(Rosica sal chena de miedo. Tie Ana bai-se a sentar, agarra l bordado de Juliana i bai-lo mirando calhada. Apuis, a modo de quelóquio)

Bie t’abisei, filha mie, nun me quejiste scuitar,
que l D. Jorge ten por manha de las moças anganhar.

(silenço)

Tanto tou pai buscou bun moço para te dar!
Bun dote yá purparado tenie para l’antregar.

(silenço)

Nun quejiste Juliana, de ls tratos de tou pai saber.
La scuolha que tu faziste fui solo pa mos perder.

Bien t’antendo filha mie, armana a ti you quije ser.
Mas naide mos poupa l delor que mos custa l daprender.

(Lhebanta-se i atira cun to la fuorça l bordado al suolo.
Apois, a la boca de l trabiado.)

Telas doces son cadenas:
Quanto tiempo ban durar?
Adonde ir cun este cuorpo
Que nun mos deixa lhibrar?

(Sal)

CORO DE LS TONTOS

Cula Primabera, l miedo
chube pulas paredes. Yá
nun cabe na rue, Juliana: de bergonha,
arrédan-se piedras quando passa ne l caminho;
scónden-se uolhos atrás las jinelas;
de ls telhados hai boteiras de risadas.

Mirai que passa
l heirói, D. Jorge
bai ne l andor popular.
Lhibre, dreito, apetecido cun sues
sporas de prata, ne l sou
macho bien arreado.

(cuntina)

Un nuobo ampeço para quelóquios mirandeses

2008-01-13T23:52:00.000Z

Son eiqui tenidos cumo quelóquios mirandeses ls que séian screbidos an mirandés, séian oureginales desta lhéngua séian traduzidos.La lhiteratura dramática mirandesa ten mui poucos títalos screbidos an mirandés, anque an pertués esses quelóquios séian muitos, habendo mesmo algues amportantes publicaçones subre esses testos.Assi i todo son yá bários ls quelóquios screbidos an mirandés i este sítio quier tener ua funcion doble:
- dar a coincer ls quelóquios screbidos an mirandés, para que las pessonas mais facelmente ls puodan repersentar i chegar als testos;- ancentibar la scrita de nuobos quelóquios an lhéngua mirandesa.Este blogue stá abierto a publicar testos que mos quérgan ambiar, pa la caixa de correio queloquios@gmail.com
Janeiro de 2008